Latest Breaking News & Headlines

စစ်ဘေးရော ကပ်ရောဂါကြောင့်ပါ ရခိုင်ဒေသခံများ နေထိုင်မှုခက်ခဲ…

139

ကပ်ရောဂါကူးစက်မှုအန္တရာယ် စိုးရိမ်စရာအဆင့်မှာ ရှိနေသေးတဲ့ ရခိုင်ပြည်နယ်တွင်းက ပြည်သူတွေဟာ ဒေသတွင်း ထုတ်ပြန်ထားတဲ့ Stay At Home နေအိမ်ထဲမှာ ပြည်သူတွေနေကြဖို့အမိန့်၊ Social Distancing တဦးနဲ့တဦး ခပ်ခွာခွာနေကြဖို့ဆိုတဲ့ လမ်းညွှန်ချက်တွေ လိုက်နာနိုင်ဖို့ထက် လတ်တလော စစ်မက်ပဋိပက္ခတွေကြောင့် အသက်ဘေးကပဲ လွတ်အောင် ပြေးနေကြရတယ်လို့ ရခိုင်ဒေသခံ ပြည်သူ့လွှတ်တော်ကိုယ်စားလှယ် ဒေါ်ခင်စောဝေကက ပြောပါတယ်။

“ရောက်လာတဲ့သူတွေက ကျမတို့ ရသေ့တောင်မြို့နယ် စေတီပြင်ကျေးရွာမှာ ပိုများပါတယ်။ အဲ့တော့ အဲဒီဘက်တွေမှာက တိုက်ပွဲတွေ ဟိုတလောကဖြစ်တယ်။ တိုက်ပွဲမရှိလည်း လက်နက်ကြီးကျည်ကျတယ်။ အဲ့တော့ ကိုယ့်မြို့ကိုယ်ကျေးရွာ ကိုယ့်အိမ်ပေါ်မှာ မနေရဲကြတော့ဘဲ ဘေးလွတ်ရာကို ထွက်ပြေးတိမ်းရှောင်လာကြသူတွေ အများကြီးရှိပါတယ်။ စေတီပြင်ကျေးရွာမှာဆိုရင် စစ်ဘေးရှောင်တွေ နောက်ထပ် ၂,၀၀၀ နီးပါးလောက်ကို ထပ်ပြီး ထွက်ပြေးလာကြတယ်လို့ သိရပါတယ်။ သူတို့စားဝတ်နေရေးတွေ အခက်အခဲ ရှိတဲ့အတွက်လည်း သွားလာရေး အင်မတန်ခက်ခဲနေတဲ့ ကြားထဲက တချို့ လာလှူနေကြတာလည်း တွေ့ရပါတယ်။”

ရောဂါဘေးရော စစ်ဘေးပါ ရင်ဆိုင်နေရတဲ့ ရခိုင်ပြည်သူတွေ ဘေးကင်းလုံခြုံစွာ အသက်ရှင်နေနိုင်ရေး ပြည်ထောင်စုအစိုးရနဲ့ ပြည်နယ်အစိုးရဘက်က အလေးအနက်ထား ဆောင်ရွက်ပေးပါလို့ ရသေ့တောင်မြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်စောဝေက ပြောပါတယ်။

“အဲ့တော့ ကျမတို့ ရခိုင်ပြည်နယ်မှာ COVID-19 အန္တရာယ်အတွက်ကိုလည်း စိုးရိမ်နေကြရတယ်။ နောက်တခါ တိုက်ပွဲတွေဖြစ်လို့ တိုက်ပွဲရှောင်တွေ အများကြီးဖြစ်လာပြီး တိုက်ပွဲကိုလည်း စိုးရိမ်နေကြရတယ်။ အဲ့သလို စိန်ခေါ်မှုတွေ အများကြီး ရှိနေတဲ့ကြားထဲက ဒီအစိုးရအနေနဲ့ တာဝန်အကြီးဆုံး ဖြစ်တဲ့အတွက် သူတို့အတွက် တာဝန်ယူစေချင်ပါတယ်။ အကုန်ပူးပေါင်းလုပ်ရင်တော့ အဆင်ပြေသွားနိုင်ပါတယ်။ လူဦးရေ ထူထပ်ပြီးနေရတယ်၊ ကျန်းမာရေး စောင့်ရှောက်မှု အားနည်းမှုတွေတော့ ရှိတယ်။ အကုန်လုံးက ဖြစ်သလိုနေနေရတဲ့ အခြေအနေတွေကိုလည်း ကျမတို့ တွေ့နေရပါတယ်။ အဲ့ဒီ့အတွက် အစိုးရအနေနဲ့ သူတို့စားရေးသောက်ရေး အဆင်ပြေဖို့ ကျန်းမာရေးတွေ အဆင်ပြေဖို့ လုံခြုံရေးကောင်းကောင်းနဲ့ နေရဖို့အတွက်လည်း အစိုးရအနေနဲ့ ကိုယ်စားလှယ်တွေနဲ့ CSO အရပ်ဘက်အဖွဲ့တွေနဲ့ ပူးပေါင်းပြီးတော့ အကုန် တာဝန်ယူ လုပ်ဆောင်ပေးဖို့ ကျမပြောချင်ပါတယ်ရှင့်။”

ရောဂါထိန်းချုပ်ရေးအတွက် COVID-19 ကူးစက်မှု အများဆုံးဖြစ်နေတဲ့ စစ်တွေမြို့ဘက်ကလာတဲ့ အသွားအလာတွေကို အဝင်ဂိတ်တွေမှာ အထူးစောင့်ကြည့် စစ်ဆေးနေပြီး ခရီးကပြန်လာသူတချို့ကို သီးခြား ကန့်သတ်ခွဲနေထိုင်တဲ့ အစီအစဉ် ကွာရမ်တင်းဝင်ခိုင်းနေတဲ့ အခြေအနေကိုလည်း ဒေါ်ခင်စောဝေက ပြောပြပါတယ်။

“ကျမတို့ ရသေ့တောင်ရဲ့ ဆိပ်ကမ်းမှာ အဖွဲ့တွေ ဖွဲ့ထားပါတယ်။ ကျန်းမာရေး အထောက်အကူပြု အဖွဲ့တွေပေါ့နော်။ ကွာရမ်တင်းနဲ့ ကိုဗစ်နဲ့ပတ်သက်တဲ့ အဖွဲ့တွေပေါ့။ စစ်တွေကလာတဲ့သူတိုင်းကို ဒီကနေစောင့်ပြီးတော့ သူတို့ရဲ့ ကိုယ်ရေးရာဇဝင်တွေယူ မေးပြီးတော့ ကွာရမ်တင်းထားပါတယ်။ အခုက ကျမတို့ ရသေ့တောင်မှာ ကားလမ်းကို ဘယ်သူမှ မသွားရဲ မလာရဲကြဘူးပေါ့နော်။ အဲ့ဒီ့ကားလမ်းကို ပိတ်ထားတဲ့ အခြေအနေ ဖြစ်တဲ့အတွက် ရေလမ်းခရီးတခုပဲ ရှိပါတယ်။ အဲ့ဒီ့အတွက်ကြောင့် ရေလမ်းခရီးကပဲ စောင့်ပြီးတော့ ကွာရမ်တင်းဝင်သင့်တဲ့သူဆို တကယ့်ကို စစ်တွေကလာတယ်ဆိုရင် ဝင်ရပါတယ်။ နေ့ချင်းပြန် တခြားကျေးရွာလေးတွေက လာကြတယ်ဆိုရင်တော့ ဝင်စရာမလိုပါဘူး။”

COVID-19 ကူးစက်မှု အများဆုံးဖြစ်ခဲ့တဲ့ ရခိုင်ပြည်နယ် စစ်တွေမြို့ဘက်မှာလည်း အခုအချိန်အထိ ပြည်သူတွေ နေအိမ်ထဲမှာပဲနေကြဖို့ အမိန့်ထုတ်ထားသလို အပြင်သွားလာခွင့်အတွက် ထုတ်ပေးထားတဲ့ကတ် အကန့်အသတ်နဲ့ သွားလာနေရဆဲ အခြေအနေကို စစ်တွေမြို့မှာ ပြည်သူတွေကို အကူအညီပေးနေတဲ့ အနောက်တံခါးဒေသ စောင့်ရှောက်ရေးအဖွဲ့ ခေါင်းဆောင် ဦးအောင်ဌေးက ပြောပြပါတယ်။

“ကျနော်တို့က မနေ့ကဆိုရင် ရခိုင်ကိုလာတဲ့ ဆေးဝါးပစ္စည်းတွေကို အမ်းတပ်နယ်ကနေ သွားခွင့်မပေးဘဲ ပိတ်ထားတာတွေ ရှိတယ်ခင်ဗျ။ အဲ့လိုမျိုးတွေကျတာ့ ဆေးရုံသုံးပစ္စည်းတွေတောင် မသွားရဘူး၊ မသယ်ရဘူးဆိုရင် တော်တော် အခက်အခဲဖြစ်တာပေါ့နော်။ ဘာပဲဖြစ်ဖြစ် လူသားချင်းစာနာမှုဆိုတဲ့ စိတ်တခုတော့ ထားသင့်တယ်လို့ ကျနော်တို့က မြင်တယ်။ လမ်းပန်း ဆက်သွယ်ရေးမှာ အရေးပေါ်အခြေအနေအရ ဖွင့်ပေးသင့်တဲ့ ကားတွေကိုတော့ ဖွင့်ပေးရပါမယ်။ သွားလာသင့်တဲ့ ကားတွေကိုလည်း ခွင့်ပြုသင့် ခွင့်ပြုပေးဖို့တော့ ဖြစ်စေချင်တယ်ဗျာ။

“ညမထွက်ရအမိန့် ဆိုတာထက်ကို ကျနော်တို့ဆီမှာက အဓိက အပြင်ထွက်ခွင့်ကတ်ပေါ့၊ ဈေးဝယ်ကတ်၊ ဆေးခန်းပြခွင့်ကတ် ဆိုတာတွေ ထုတ်ပေးထားတယ်။ အဲ့ဒါတွေကတော့ နည်းနည်း အခက်အခဲရှိတယ်ဗျ။ ဘယ်လိုအခက်ခဲရှိလဲဆိုတော့ သဘောမှာက ဈေးဝယ်ကတ် အဝါရောင်ဆို ဈေးဝယ်၊ အနီရောင်ဆို ဆေးခန်းပြခွင့်ကတ်ပေါ့၊ ၂ ယောက်သွားလာခွင့် ပေးထားတာပေါ့။ စစ်တွေတင်မကဘူး။ တချို့မြို့ ဥပမာ ကျောက်ဖြူမှာဆို ၁၁ နာရီဆို ဈေးပိတ်သွားတော့ လူတွေလည်း ၁၁ နာရီနောက်ပိုင်း မထွက်ရတော့ဘူးဆိုတော့ တော်တော် အခက်အခဲ ဖြစ်သွားတာပေါ့။ အဲ့လိုမျိုး အခက်အခဲတွေက ရခိုင်ဘက်မှာ ကျောက်ဖြူရော စစ်တွေမှာလည်း အဲ့လိုအခြေအနေမျိုးတွေ ရှိတယ်။ အပြင်ကိုသွားလို့ ကတ်မပါရင် ဖမ်းတယ် ဆီးတယ် လျော်ကြေးတပ်တယ်။ အခုလည်း ၁၀ ရက်နောက်ပိုင်း ဥပဒေအရ အရေးယူမယ်ဆိုပြီး အမိန့်ထုတ်ထားတာလည်း ရှိပါတယ်။ အဲ့လိုမျိုး အခြေအနေတွေ နောက်ဆုံးကြုံတွေ့နေရပါတယ်ခင်ဗျ။”

အခုလက်ရှိ ရခိုင်ပြည်နယ်တွင်း ရခိုင်လက်နက်ကိုင်တပ်နဲ့ အစိုးရစစ်တပ်တို့ကြား တိုက်ပွဲတွေအတွင်း ဘေးလွတ်ရာ တိမ်းရှောင် ထွက်ပြေးလာရတဲ့ စစ်ပြေးဒုက္ခသည်ပေါင်းက အခုဆိုရင် ၂၂၆,၈၀၄ ရှိသွားပြီလို့ စစ်ကြောင့်ရော COVID-19 ကြောင့်ပါ သွားလာမှုတွေ အကန့်အသတ်တွေကြားက စစ်ဘေးရှောင်တွေဆီ သွားကူညီပေးတဲ့ ရခိုင်တိုင်းရင်းသားမျိုးနွယ်များ အစည်းအရုံး (REC) က ပြီးခဲ့တဲ့ အောက်တိုဘာလ ၁ ရက်နေ့က နောက်ဆုံး စာရင်းထုတ်ပြန်ထားပါတယ်။

အခုလိုအဆုံးထိဖတ်ရှုပေးတဲ့အတွက် ကျွန်တော်တို့ Page မှ အထူးပင်ကျေးဇူးတင်ရှိပါတယ်နော်…နောက်များမှာလည်း အခုလိုဆယ်လီတို့ရဲ့ သတင်းများနှင့် ပြည်တွင်းပြည်ပသတင်းများကို အချိန်နှင့် တပြေးညီတင်ဆက်ပေးမှာ ဖြစ်တဲ့အတွက်ကျွန်တော်တို့ Page လေးကို Like & See First လေးလုပ်ပေးသွားကြပါအုံးနော်….

Leave A Reply

Your email address will not be published.

error: Content is protected !!