Latest Breaking News & Headlines

KIA တပ်စခန်းနှစ်ခု ဖယ်ရှားဖို့ မြန်မာစစ်တပ်တောင်းဆို…

258

ကချင်ပြည်နယ် ချီဖွေမြို့နယ်အတွင်းက ကချင်လွတ်လပ်ရေးအဖွဲ့ KIO ရဲ့ တပ်စခန်း ၂ ခုကို ဖယ်ရှားဖို့ တပ်မတော်ဘက်က တောင်းဆိုထားတာပြီး နှစ်ဘက်အကြား နယ်မြေအငြင်းပွားမှုဖြစ်နေတဲ့သတင်းကို ပြောပြပါမယ်။

ကချင်လက်နက်ကိုင်အဖွဲ့ KIO ရဲ့ တပ်စခန်း ၂ ခု ဖယ်ရှားဖို့ကို ကချင်ပြည်နယ် လုံခြုံရေးနဲ့ နယ်စပ်ရေးရာဝန်ကြီးဌာနက ဒီလ ၈ ရက်နေ့မှာ PCG ခေါ် ကချင်ငြိမ်းချမ်းရေးအကျိုးဆောင်အဖွဲ့က တဆင့် အကြောင်းကြားခဲ့တာဖြစ်ပါတယ်။

အစိုးရဘက်က အကြောင်းကြားလာတာနဲ့ ပတ်သက်ပြီး KIO ရဲ့ ပြန်ကြားရေးတာဝန်ခံ ဗိုလ်မှူးကြီးနော်ဘူက VOA ကို အခုလို ပြောပါတယ်။

“ဒီ ချီဖွေနဲ့ ဆော့လော်ကြားမှာ ဟလ ဆိုတဲ့ ကျနော်တို့ရဲ့ တပ်စခန်းနဲ့ မန်ဒုံဆိုတဲ့ တပ်စခန်းရှိပါတယ်။ အဲဒီတပ်စခန်း ၂ ခုကို ဖယ်ရှားဖို့ အကြောင်းကြားလာတာ ဖြစ်ပါတယ်။ သူ့ရဲ့ စာထဲမှာ ပါတာကတော့ ဒီ Post ၂ ခုကတော့ အသစ် တိုးချဲ့လာတဲ့ တပ်စခန်းဖြစ်နေတဲ့အတွက် ဖယ်ရှားဖို့ ပြောထားတယ်။ ၇ ရက်ကနေ ၁၃ ရက်ပေါ့နော် ၉ လပိုင်း အဲဒီကြားမှာ ဖယ်ရှားပါတဲ့။ တကယ်လို့များ အဲဒီကြားမှာ မဖယ်ရှားလို့ရှိရင်တော့ နယ်မြေရှင်းလင်းရေးလုပ်မယ်ဆိုပြီးတော့ အကြောင်းကြားလာတာဖြစ်ပါတယ်။”

KIO ဘက် ဒီတပ်စခန်းတွေဟာ အသစ်တည်ဆောက်တာ မဟုတ်ကြောင်းနဲ့ တကယ်လို့ ဖယ်ရှားဖို့ လိုအပ်ရင်လည်း ဆွေးနွေးညှိနှိုင်းပြီး ဖယ်ရှားမှာဖြစ်ကြောင်း ပြန်လည်အကြောင်းကြားခဲ့လို့ ပြောပါတယ်။

KIO က အကြောင်းပြန်တဲ့အပေါ်မှာ မြောက်ပိုင်းတိုင်းစစ်ဌာနချုပ်ဘက် တပ်စခန်းတွေ ရွှေ့ခိုင်းတာဟာ လမ်းဖောက်လုပ်ရေးအတွက် ဖြစ်ကြောင်းလည်း ထပ်မံအကြောင်းကြားလာတယ်လို့ PCG က ဦးလမိုင်ဂွမ်ဂျာက ပြောပါတယ်။

“အဲဒါ တိုင်းကလည်း ပြောထားကလည်း အဲဒီနေရာ သူတို့ ဖယ်ခိုင်းတဲ့အကြောင်းရင်းကတော့ လမ်းဟောင်းဖြစ်တယ်။ အဲဒီ လမ်းဟောင်းအပေါ်မှာ နေတာဖြစ်တဲ့အတွက်ကြောင့်မို့ အဲဒါ ပြည်သူလူထုက လွှတ်တော်မှ လွှတ်တော်အမတ်ကနေ တဆင့်တင်ပြလာတယ်။ အဲဒါ အခုသူတို့ လမ်းဖောက်ဖို့ ရှိတယ်။ လမ်းဖောက်တာကလည်း တပ်မတော်က ဖောက်မှာ မဟုတ်ဘူး။ အစိုးရကနေ ဖောက်မှာ ဖြစ်တယ်ပေါ့။ သူတို့အနေနဲ့ကတော့ လမ်းဖောက်ပြီးဆိုရင်တော့ မိုင်းရှင်းလင်းရေး ဘာညာပါ လုပ်ရမှာပေါ့။ အဲဒါကို ပြောခြင်းဖြစ်ပါတယ်ဆိုပြီးမှ အကြောင်းပြန်လာတယ်။ အဲဒီအပေါ်မှာလည်းပဲ ကျနော်တို့ KIO ကိုလည်းပဲ တင်ပြထားပါတယ်။”

တပ်မတော် သတင်းမှန်ပြန်ကြားရေးအဖွဲ့က ဗိုလ်မှူးချုပ် ဇော်မင်းထွန်းကတော့ လက်ရှိ တပ်စခန်းဖယ်ရှားရေးအပေါ်မှာ အခုလို ပြောဆိုပါတယ်။

“အဓိကကတော့ KIA နဲ့ ကျနော်တို့ အစိုးရရဲ့ ကြားထဲမှာ ယခင်က Bilateral သဘောတူညီချက်တွေ ရှိပြီးသား ဖြစ်တယ်။ ဒီဟာတွေလည်း ရှိပြီးသားဖြစ်ပါလိမ့်မယ်။ ဒါတွေနဲ့ မသက်ဆိုင်တဲ့နေရာတွေမှာ လာရောက်နေထိုင်တဲ့အတွက်ကြောင့် ဒါနဲ့ပတ်သက်ပြီးတော့ ကျနော်တို့ သတိပေးရခြင်းဖြစ်တယ်လို့ ကျနော် ပြောချင်ပါတယ်ဗျ။”

KIO ဘက်က ပြန်ကြားရေးတာဝန်ခံ ဗိုလ်မှုးကြီးနော်ဘူကတော့ ၂၀၁၃ ခုနှစ် မေလ ၂၈ ကနေ ၃၀ရက်နေ့အကြားဆွေးနွေးပွဲအရ ပြည်သူတွေ သွားလာတဲ့ လမ်းမကြီးတွေဘေးက နှစ်ဘက်တပ်တွေ ဆုတ်ခွာပေးဖို့ သဘောတူညီခဲ့ကြောင်းနဲ့ လက်ရှိ တပ်စခန်း ၂ ခုဟာ လမ်းမကြီး အနီးမှာ မဟုတ်ကြောင်း အခုလို ပြောပါတယ်။

“အခု ကျန်ရှိနေတဲ့ အဲဒီ တပ်စခန်း ၂ ခုကတော့ ပြည်သူလူထုတွေ သွားလာလှုပ်ရှားတဲ့နေရာမှာ အဟန့်အတား အနှောက်အယှက်ပေးတဲ့ တပ်စခန်းတော့ မဟုတ်ဘူးပေါ့နော်။ အဲဒါကြောင့် ကျနော်တို့ကလည်း အခု အသစ် တိုးချဲ့ထားတာလည်း မဟုတ်ဘူး။ ပြည်သူလူထုသွားလာလှုပ်ရှားတဲ့နေရာမှာလည်း အနှောက်အယှက် ပေးတဲ့စခန်းလည်း မဟုတ်ဘူးပေါ့။ သူတို့ရဲ့ ပြောတဲ့နေရာမှာတော့ လမ်းဖောက်ဖို့ ပြည်သူလူထု သွားလာလှုပ်ရှားတဲ့နေရာမှာ အနှောက်အယှက် ပေးတယ်ဆိုပြီးမှ ပြောလာတာတော့ ရှိပါတယ်။ ဒါပေမဲ့ အဲဒါကတော့ သိပ်ပြီး မှန်ကန်တာတော့ မဟုတ်ဘူးလို့ ပြောလိုပါတယ်။ ”

လောလောဆည်မှာတော့ နှစ်ဘက်အကြားမှာ တပ်စခန်းနေရာရွှေ့ပြောင်းရေးနဲ့ ပတ်သက်ပြီး ညှိနှိုင်းနေဆဲ ရှိကြောင်း ဦးလမိုင်ဂွမ်ဂျာက ပြောပါတယ်။

ပြီးခဲ့တဲ့ ရက်ပိုင်းတွေကတော့ ရှမ်းပြည်နယ် မြောက်ပိုင်းမှာ အစိုးရတပ်မတော်နဲ့ KIA အကြား တိုက်ပွဲ ၅ ကြိမ်ထက်မနည်းဖြစ်ပွားခဲ့တာကြောင့် ဒေသခံပြည်သူတွေကတော့ လက်ရှိ နယ်မြေအငြင်းပွားမှုကနေ ကချင်ပြည်နယ်အတွင်းမှာ စစ်ရေးတင်းမာမှုတွေ ထပ်မံဖြစ်ပွားလာမှာကို စိုးရိမ်တာတွေလည်း ရှိနေပါတယ်။

အခုလိုအဆုံးထိဖတ်ရှုပေးတဲ့အတွက် ကျွန်တော်တို့ Page မှ အထူးပင်ကျေးဇူးတင်ရှိပါတယ်နော်…နောက်များမှာလည်း အခုလိုဆယ်လီတို့ရဲ့ သတင်းများနှင့် ပြည်တွင်းပြည်ပသတင်းများကို အချိန်နှင့် တပြေးညီတင်ဆက်ပေးမှာ ဖြစ်တဲ့အတွက်ကျွန်တော်တို့ Page လေးကို Like & See First လေးလုပ်ပေးသွားကြပါအုံးနော်….

Leave A Reply

Your email address will not be published.

error: Content is protected !!