Latest Breaking News & Headlines

ရွှေလီရောက် အထောက်အထားမဲ့မြန်မာလူမျိုးတွေကို တရုတ်လွှဲပြောင်း…

87

မြန်မာနယ်စပ် တရုတ်နိုင်ငံ ရွှေလီမြို့က မြန်မာရွှေ့ပြောင်းလုပ်သား နှစ်ဦးမှာ ကိုဗစ်ရောဂါပိုး စမ်းသပ်တွေ့ရှိပြီးတဲ့နောက် အထောက်အထားမရှိတဲ့ မြန်မာရွှေ့ပြောင်းလုပ်သားတွေကို တရုတ်တာဝန်ရှိတွေက နယ်စပ်ဂိတ်ကဆင့် လွှဲပြောင်းပေးနေတယ်ဆိုတဲ့ သတင်းကို တင်ပြချင်ပါတယ်။ ဗွီအိုအေမြန်မာပိုင်းသတင်းထောက် မအဂ္ဂနွန်က သတင်းပေးပို့ထားပါတယ်။

ရွှေလီမြို့ရောက်မြန်မာနိုင်ငံသား နှစ်ယောက်မှာ ကိုဗစ်ရောဂါပိုးတွေ့ရှိပြီးတဲ့ နောက် တရုတ်အာဏာပိုင်တွေက ရွှေလီမြို့ အသွားအလာနဲ့ အဝင်အထွက်တွေကို ကန့်သတ်ထားပြီး တစ်ပတ်ကြာ လော့ဒေါင်းချလိုက်ပါတယ်။

ဒါ့အပြင် ရွှေလီမြို့က လူဦးရေ ၆၀,၀၀၀ ကျော်ကိုလည်း ရောဂါပိုးဓါတ်ခွဲစမ်းသပ် စစ်ဆေးခဲ့ပါတယ်။ အားလုံးစစ်ဆေးပြီးသလောက် အရင်တွေ့ထားတဲ့ မြန်မာနှစ်ဦးက လွဲလို့ ရွှေလီမြို့မှာ ကိုဗစ်ရောဂါပိုးကူးစက်ခံရသူ အသစ်မတွေ့ထားဘူးလို့ ရွှေလီအာဏာပိုင်တွေက ပြောထားပါတယ်။

ဒါ့အပြင် တရုတ်နိုင်ငံတွင်း နေထိုင်လုပ်ကိုင်ခွင့်အထောက်အထားမရှိတဲ့ မြန်မာနိုင်ငံသားတွေကိုလည်း လိုအပ်တဲ့ ကျန်းမာရေးအခြေအနေကို စစ်ဆေးပြီး တရားဝင်ပြန်လွှဲပေးနေတယ်လို့ရွှေလီမြို့မှာရှိတဲ့ မြန်မာလုပ်သား ကိုနေမင်းဖြိုးက VOA ကို ပြောပါတယ်။

“ဟုတ်တယ်၊ ဟုတ်တယ်။ အဲ့လိုမျိုး စာအုပ်အနီတို့၊ အစိမ်းတို့ ဘာမှမရှိတဲ့သူတွေ ပြန်ပို့ပေးတယ် ပြောတယ်။ ပြီးတော့ ပြန်မယ်ဆိုလို့ရှိရင် အဲ့က တရားဝင်ပြန်လွှတ်ပေးတယ်။ အဲ့လိုမျိုး၊ ဒီနေ့က စပြီး သူတို့ အဲ့လိုမျိုးပြန်လွှတ်တယ် အဲ့လိုမျိုးတွေပေါ့။”

တရုတ်နိုင်ငံဘက်က မြန်မာရွှေ့ပြောင်းလုပ်သားတွေကို ကျန်းမာရေးအခြေအနေ သေချာစစ်ဆေးပြီး ပြန်ပို့ပေးနေတာပါ။ ဒါပေမဲ့ မြန်မာဘက်က တင်းကြပ်မှုတွေ ရှိနေတယ်လို့ ရွှေလီက မြန်မာပရဟိတအဖွဲ့ ခွန်မင်းသန်းက အခုလိုပြောပါတယ်။

“တရုတ်ဘက်က သူတို့လိုတာလေးတွေ သူတို့ သေချာဆောင်ရွက်ပေးတယ်၊ ဒီကျန်းမာရေးရော သူတို့အကုန်လုံးပေါ့ သူတို့လိုအပ်တာတွေ အကုန်လုံးဖြည့်ဆီပြီးမှ ဒီကို ပြန်ပို့ပေးတယ်။ သေသေချာချာပေါ့ ဂရုတစိုက်ပြန်ပို့ပေးတယ်။ ဒီမြန်မာပြည်ရောက်မှပဲ မြန်မာပြည်ကဟာတွေ ဟိုတောင်းလိုက် ဒီဟာတောင်းလိုက်နဲ့ အခုလည်း သူတို့ဘာလဲ ဆေးစစ်စာရွက်တွေလေး တရုတ်ပြည်က ဆေးစစ်ထားတဲ့ အခြေအနေကောင်းတဲ့ စာရွက် အဲ့စာရွက် သူတို့ကို ပြန်မပေးဘူးလို့ သတင်းကြားထားတယ်၊ အဲ့ဒါ သူတို့ကို မေးကြည့်တော့ ဘာစာရွက် စာတမ်းမှ မပေးဘူးတဲ့။”

မူဆယ်ခရိုင် အုပ်ချုပ်ရေး လက်ထောက်ညွှန်ကြားရေးမှူး ဦးမောင်မောင်သန်းကတော့ တရုတ်နိုင်ငံကနေ ပြန်လာတဲ့ ရွှေ့ပြောင်းလုပ်သားတွေကို ကုန်ကျစရိတ်ကောက်ခံတာ မရှိဘဲ ကျန်းမာရေးစောင့်ရှောက်ဖို့ လိုအပ်တာတွေ သက်ဆိုင်ရာဌာနက စီစဉ်ဆောင်ထားကြောင်း ဆိုပါတယ်။

တရားမဝင်လမ်းကြောင်းကနေ ခိုးဝင်ခိုးထွက်မရှိစေဖို့ နှစ်နိုင်ငံပူးပေါင်းဆောင်ရွက်ပြီး၊ တရားမဝင်မြန်မာနိုင်ငံသားတွေ စစ်ဆေးတွေ့ရှိရင်လည်း နန်းတော်ဝင်ပေါက်ကနေဆင့် ပြန်လွှဲပေးဖို့ တရုတ်အာဏာပိုင်တွေကို အကြောင်းကြားထားတယ်လို့ ဦးမောင်မောင်သန်းက VOA ကို ဆက်ပြောပါတယ်။

“လွှဲပြောင်းတယ်ဆိုတာ သူတို့ဘက်ကပဲ ကျနော်ဘက်ကို ကမ်းလှမ်းရင် ကျနော်တို့က သက်ဆိုင်ရာပြည်နယ်အစိုးရအဖွဲ့ကို တင်ပြ၊ နောက်လဝက ဥပဒေအရဆိုရင် လဝက ကနေပြီးတော့ လက်ခံနိုင်မယ့်ရက်ပေါ့၊ သူတို့လွှဲမယ့် ရက်ကို နန်းတော်ပေါက်ကနေပြီးတော့ ကျန်းမာရေးစိစစ်ပြီးတော့ ပြန်လွှဲပေးပြောင်းလက်ခံတာပေါ့ဗျ။ လွှဲပြောင်းလက်ခံတယ်၊ ပြီးလိုရှိရင် ကျနော်ဆီမှာ အဲ့လူတွေကို ကွာရန်တင်းထားတာပေါ့၊ Quarantine ဆိုတာ ပြည်ထောင်စုအားကစားကွင်းမှာ Quarantine ထားတယ်၊ ပြီးတော့ ကျန်းမာရေးစိစစ်တယ်၊ swab ယူတယ်ပေါ့နော်၊ အဲ့ဒီမှာမှ Swab ယူပြီးတဲ့အခါမှာ ကျန်းမာရေးကောင်းတယ်၊ clear ဖြစ်တယ်ပေါ့နော်၊ negative ပြတယ်ဆိုမှ ဒေသအသီးသီးကို ပြန်လွှတ်တာပေါ့။”

နယ်စပ်ဂိတ်တွေကနေ မြန်မာနိုင်ငံကို ပြန်ဝင်လာတဲ့ အလုပ်သမားတွေကို မြန်မာပြည်ဘက်အခြမ်း လုံခြုံရေးတာဝန်ရှိသူတွေက ငွေကြေးကောက်ခံတာတွေမလုပ်ဖို့နဲ့ ကျန်းမာရေးစောင့်ရှောက်မှုတွေ အပြည့်အဝကူညီပေးဖို့ လိုလားတယ်လို့ မြန်မာလုပ်သားတွေက VOA ကို ပြောပါတယ်။

မြန်မာနိုင်ငံမှာ ကိုဗစ်ရောဂါ ကူးစက်မှုတွေ တကျော့ပြန် ကြီးထွားလာနေတာကြောင့် တရုတ်နိုင်ငံ အပါအဝင် အိမ်နီးချင်းနိုင်ငံတချို့က နယ်စပ်ဒေသတွေမှာ ကျန်းမာရေးအတွက် တင်းတင်းကျပ်ကျပ် စောင့်ကြည့်စစ်ဆေးနေပါတယ်။

မြန်မာနိုင်ငံ ကျန်းမာရေးနဲ့ အားကစားဝန်ကြီးဌာနရဲ့စက်တင်ဘာ ၁၆ ရက်နေ့ အစောပိုင်းအထိ ထုတ်ပြန်ချက်အရ ကိုဗစ်ရောဂါကြောင့် သေဆုံးသူ ၃၉ယောက် အပါအဝင် ရောဂါကူးစက်သူ ၃,၆၀၀ ကျော် ရှိကြောင်း အတည်ပြုထားပါတယ်။

အခုလိုအဆုံးထိဖတ်ရှုပေးတဲ့အတွက် ကျွန်တော်တို့ Page မှ အထူးပင်ကျေးဇူးတင်ရှိပါတယ်နော်…နောက်များမှာလည်း အခုလိုဆယ်လီတို့ရဲ့ သတင်းများနှင့် ပြည်တွင်းပြည်ပသတင်းများကို အချိန်နှင့် တပြေးညီတင်ဆက်ပေးမှာ ဖြစ်တဲ့အတွက်ကျွန်တော်တို့ Page လေးကို Like & See First လေးလုပ်ပေးသွားကြပါအုံးနော်….

Leave A Reply

Your email address will not be published.

error: Content is protected !!