Latest Breaking News & Headlines

ကျန်းမာရေးစည်းမျဉ်းနဲ့အညီ စက်ရုံတွေဆက်ဖွင့်ထားမည်…

147

စက်ရုံတွေမှာ ကိုဗစ်အတည်ပြုလူနာတွေ ရှိလာပေမယ့်လို့ အဲဒီစက်ရုံတွေကို မပိတ်သိမ်းဘဲ ရောဂါအတည်ပြုလူနာနဲ့ ၆ ပေ ပတ်လည်မှာ ရှိသူတွေနဲ့ အနီးနားထိတွေ့မှုရှိသူတွေကိုသာ လုပ်ငန်းခွင်လာရောက်ခြင်း မပြုဖို့ အလုပ်သမားဝန်ကြီးဌာနက ထုတ်ပြန်ထားတဲ့အကြောင်း ပြောပြပေးပါမယ်။ ဒီသတင်းကို ဗွီအိုအေမြန်မာပိုင်း သတင်းထောက်စုစုက တင်ဆက်ပေးမှာပါ။



ကိုဗစ်ရောဂါထိန်းချုပ်ကာကွယ်ရေးနဲ့ ပတ်သက်ပြီး စက်ရုံ၊ အလုပ်ရုံ၊ အလုပ်ဌာနတွေအနေနဲ့ လုပ်ငန်းခွင်အတွင်း လိုက်နာရမယ့်အချက်တွေကို အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာနက ညွှန်ကြားချက် ၆ ချက်ကို စက်တင်ဘာ ၁၅ ရက်နေ့က ထုတ်ပြန်လိုက်တာပါ။ စက်မှုဇုန်အသီးသီးက စက်ရုံလုပ်သား ၆၀ ကျော် ကိုဗစ်အတည်ပြုလူနာစာရင်းထဲ ပါဝင်လာလို့ စက်မှုဇုန်စက်ရုံတွေကို ယာယီပြန်ပိတ်ပေးဖို့ အလုပ်သမားရေးလှုပ်ရှားနေသူတွေက အစောပိုင်းမှာ တောင်းဆိုခဲ့ကြတာပါ။

အလုပ်သမားဝန်ကြီးဌာနရဲ့ ထုတ်ပြန်ချက်ထဲမှာ ကိုဗစ်ရောဂါအတည်ပြုလူနာ တွေ့ရှိခဲ့ရင် သူနဲ့ ၆ ပေပတ်လည်မှာ လုပ်ကိုင်နေသူတွေနဲ့ လိုင်းတလိုင်းတည်း အလုပ်လုပ်သူတွေအပါအဝင် အဆောင်တခုတည်းမှာ နေထိုင်သူတွေ၊ ဖယ်ရီအတူစီးသူတွေ၊ ထမင်းအတူစားသူတွေကို အလုပ်ခွင်ကို လာရောက်ခြင်းမပြုဖို့ ကန့်သတ်ရမယ်လို့ ဖော်ပြထားပါတယ်။ ကပ်ရောဂါကြောင့် လုပ်ငန်းခွင်ထိခိုက်ရသူတွေကို တချို့အလုပ်ရှင်တွေဘက်က တာဝန်ယူတာရှိပေမယ့် တချို့ကလည်း တာဝန်မယူနိုင်ကြလို့ ဒါတွေကို ညှိနှိုင်းပြီး သွားနေရတယ်လို့ အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က VOA ကိုပြောပါတယ်။

“Quarantine ဝင်မယ့်သူနဲ့ ထပ်ပြီးတော့ထိတွေ့ခဲ့တဲ့အဖွဲ့နဲ့ ပတ်သက်ပြီး ဒါတွေကကျတော့ တချို့အလုပ်ရှင်ကလည်း တာဝန်ယူလိုက်တာရှိတယ်။ တချို့ကလည်း တာဝန်မယူဘူးဆိုတော့။ ဒီဥစ္စာကတော့ ညှိနှိုင်းပြီးသွားနေရတာ နည်းနည်းတော့ ပြောရခက်တယ်။ ကျန်းမာရေးအရ လုပ်တဲ့ဟာဆိုရင်လည်း အမျိုးသမီးနဲ့ပတ်သက်တဲ့ ဒီကိုယ်ဝန်ဆောင်တို့၊ ဘာတို့တော့ လူမှုဖူလုံရေးက ဆက်ပေးမယ်ဆိုပြီး အဲနေ့က ဆွေးနွေးခဲ့တာလေးတွေ ရှိတယ်။”

အလုပ်သမားတွေကို လုပ်ခလစာပေးဖို့ ပြဿနာရှိနေတဲ့အပေါ် အစိုးရရဲ့ထုတ်ပြန်ချက်တွေဟာ ပြတ်သား တိကျဖို့လိုတယ်လို့ မြန်မာနိုင်ငံစက်မှုလက်မှုနဲ့ ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS) ပြောခွင့်ရ ဦးသက်နှင်းအောင်က ဆိုပါတယ်။

“အဓိကတော့ ဒီအစိုးရတရပ်အနေနဲ့ အလုပ်ရှင်နဲ့ အလုပ်သမားကြားမှာ မျှမျှတတရပ်တည်ဖို့လိုတယ်။ နောက်တခုက ကျနော်တို့တွေ လတိုင်းထည့်ခဲ့တဲ့ လူမှုဖူလုံရေး ရန်ပုံငွေကို ဒီကာလမှာတော့ ထိထိရောက်ရောက်အသုံးချပေးဖို့ တောင်းဆိုချင်တယ်။ ဆိုပါစို့ အခုရောဂါကူးစက်မှု တောက်လျှောက်မြင့်မားနေတဲ့ကာလမှာ ကျနော်တို့အနေနဲ့ကတော့ စက်ရုံအလုပ်ရုံတွေကို တလတန်သည်၊ နှစ်လတန်သည်ပေါ့လေ၊ ယာယီပိတ်ထားသင့်တယ်။ ယာယီပိတ်ထားတဲ့ကာလအတွင်းမှာ အလုပ်သမားတွေကို အနည်းဆုံးလုပ်ခ လစာပေးဖို့အတွက် အလုပ်ရှင်ဆီက ရာခိုင်နှုန်းတခု၊ အစိုးရက ရာခိုင်နှုန်းတခု သတ်မှတ်ပြီးတော့မှ အနည်းဆုံးလုပ်ခ လစာအပြည့်နဲ့ ပိတ်လိုက်မယ်ဆိုရင်တော့ နိုင်ငံတနိုင်ငံလုံးအနေနဲ့ ရောဂါကူးစက်မှုကို ထိန်းချုပ်နိုင်လိမ့်မယ်လို့ ကျနော်တို့က ယူဆတယ်။”

တနိုင်ငံလုံးက စက်ရုံတွေကို ဧပြီလတုန်းက ပိတ်ထားခဲ့ပေမယ့် ကျန်းမာရေးဝန်ကြီးဌာနရဲ့ ကပ်ရောဂါကာကွယ်ရေး အစီအမံတွေ လုပ်ထားတဲ့ စက်ရုံတွေကိုတော့ မေလကစပြီး ပြန်ဖွင့်ခွင့်ပေးခဲ့ပါတယ်။ အလုပ်လက်မဲ့ အကျိုးခံစားခွင့် ကောက်ခံထားတာ မရှိပေမဲ့ တကယ်တမ်း စက်ရုံတွေ ပိတ်ရပြီဆိုရင် အလုပ်သမားတွေအတွက် ရန်ပုံငွေ ခေါင်းစဉ်တခုအောက်ကနေ အစိုးရက စီစဉ်ပေးနိုင်ဖို့ကို အလုပ်သမားတွေက မျှော်လင့်နေကြတာပါ။

အခုလိုအဆုံးထိဖတ်ရှုပေးတဲ့အတွက် ကျွန်တော်တို့ Page မှ အထူးပင်ကျေးဇူးတင်ရှိပါတယ်နော်…နောက်များမှာလည်း အခုလိုဆယ်လီတို့ရဲ့ သတင်းများနှင့် ပြည်တွင်းပြည်ပသတင်းများကို အချိန်နှင့် တပြေးညီတင်ဆက်ပေးမှာ ဖြစ်တဲ့အတွက်ကျွန်တော်တို့ Page လေးကို Like & See First လေးလုပ်ပေးသွားကြပါအုံးနော်….

Leave A Reply

Your email address will not be published.

error: Content is protected !!