Latest Breaking News & Headlines

COVID-19 ကူးစက်မှု ဗဟိုအချက်အချာဖြစ်နေတဲ့ ရခိုင်မှာ ကိုယ်စားလှယ်လောင်းတွေ မဲဆွယ်စည်းရုံးခွင့် မရှိသလောက်ဖြစ်နေ…

69

ပြည်ထောင်စုရွေးကောက်ပွဲကော်မရှင်က အင်္ဂါနေ့က စတင်ခွင့်ပြုလိုက်တဲ့ ရွေးကောက်ပွဲ မဲဆွယ်စည်းရုံးရေးတွေမှာ COVID-19 ကြောင့် စည်းကမ်းချက်တွေ ပြင်းပြင်းထန်ထန် သတ်မှတ်ထားပါတယ်။အထူးသဖြင့် ရောဂါကူးစက်မှုနှုန်း အများဆုံးဖြစ်နေတဲ့ ရခိုင်ပြည်နယ်လိုနေရာမှာ နေအိမ်တွေမှာပဲနေဖို့၊ မဲဆွယ်စည်းရုံးတာမျိုး မလုပ်ဖို့ သတ်မှတ်ချက်တွေရှိနေပါတယ်။ ဒါကြောင့် ရခိုင်ပြည်နယ်က လွှတ်တော်ကိုယ်စားလှယ်လောင်းတွေ ရင်ဆိုင်နေရတဲ့ အခက်အခဲ စိန်ခေါ်မှုတွေ ဘယ်လောက်ထိရှိနေလဲ။ ရွေးကောက်ပွဲကို ဘယ်လို ရိုက်ခတ်နိုင်သလဲ။

ရခိုင်အမျိုးသားပါတီ (ANP)ရဲ့ ခေါင်းဆောင်တဦးဖြစ်တဲ့ ဦးထွန်းအောင်ကျော်ကို ကိုဝင်းမင်းက ဆက်သွယ်မေးမြန်းထားပါတယ်။ရခိုင်အမျိုးသားပါတီ (ANP) ရဲ့ နိုင်ငံရေးမူဝါဒဦးဆောင်ကော်မတီဝင် ဦးထွန်းအောင်ကျော်အနေနဲ့၊ အခုနိုဝင်ဘာ (၈) ရက်ရွေးကောက်ပွဲမှာ၊ ရခိုင်ပြည်နယ် စစ်တွေမြို့နယ် အမျိုးသားလွှတ်တော်မဲဆန္ဒနယ်အမှတ် (၃) ကနေ ဝင်ပြိုင်၊ မဲဆွယ်တော့မှာမို့၊ ဒီအခက်အခဲကို မနေ့ကမှ စတွေ့တဲ့အကြောင်း ခုလိုစရှင်းပြပါတယ်။” ပြည်ထောင်စုရွေးကောက်ပွဲကော်မရှင်ကနေ လိုက်နာဖို့အချက်တွေဆိုပြီးတော့၊ အဲ့ဒိအထဲမှာ ဟို နံပါတ် (၃) မှင်အနီနဲ့ပေါ့၊ မဲဆွယ်စည်းရုံးရေးလုပ်ငန်းတွေဆောင်ရွက်တဲ့အခါ၊ ကျန်းမာရေးနဲ့ အားကစားဝန်ကြီးဌာနက ထုတ်ပြန်တဲ့အမိန့်နဲ့ညွှန်ကြားချက်တွေ၊ ထပ်မံပြီးထုတ်ပြန်မယ့် အမိန့်နဲ့ညွှန်ကြားချက်တွေ၊ နောက် ရွေးကောက်ပွဲမဲဆွယ်စည်းရုံးရေးကာလမှာ ထုတ်ပြန်လာတဲ့ ဒေသန္တရအမိန့်တွေနဲ့ အညီ ဆောင်ရွက်ဖို့လိုတယ်ဆိုပြီးတော့ ပါပါတယ်။

အဲ့ဒီမှာတခါ နေအိမ်မှာနေထိုင်ဖို့အတွက် Stay at Home ဆိုပြီးတော့ သတ်မှတ်ထားတဲ့၊ တိုင်းဒေသကြီး၊ ပြည်နယ်၊ မြို.နယ်၊ ရပ်ကွက်၊ ကျေးရွာဒေသတွေမှာ လှည့်လည်မဲဆွယ်စည်းရုံးခြင်း၊ ပြင်ပနေရာတွေ၊ အဆောက်အဦးတွေအတွင်းမဲဆွယ်စည်းရုံးခြင်းနဲ့ အိမ်တိုင်ရာရောက်မဲဆွယ်စည်းရုံးခြင်းလုပ်ငန်းတွေကို၊ လုံးဝ (လုံးဝ) ဆောင်ရွက်ခြင်းမပြုရဘူးဆိုပြီးတော့ ဖော်ပြထားပါတယ်။

“ကိုဝင်းမင်း။ ။ အဲ့ဒီတော့ အခု ရခိုင်ပြည်ရဲ့အခု ကိုဗစ်အဖြစ်များနေတဲ့ အနေအထားမှာ၊ ဒါက ဘယ်လိုသက်ရောက်မှု ဖြစ်လာမလဲ။

ဦးထွန်းအောင်ကျော်။ ။ ကျွန်တော်တို့ ရခိုင်ပြည်နယ်မှာ မြို.နယ် ၁၇ မြို.နယ်မှာ အခု ရမ်းဗြဲမြို့ နယ်ကလွဲလို့၊ ကျန်တဲ့ ၁၆ မြို.နယ်မှာ တော်တော်ကြီးကို ရောဂါပျံ့နှံ့မူရှိတယ်။ပိုးတွေ့တာနဲ့ကို အဲ့ဒီလမ်းတို့၊ ရပ်ကွက်တို့ကို Lockdown လုပ်တာပဲ။နောက်လိုအပ်သလို Home Stay နေရမှာတို့၊ အဲ့လိုအချက်တွေနဲ့ကြေညာထားတယ်ဆိုတော့၊ ဒီလိုကြေညာချက်နဲ့လွတ်ကင်းတဲ့ မြို့နယ်က၊ ရခိုင်ပြည်နယ်မှာ ရမ်းဗြဲမြို.နယ် တစ်ခုထဲရှိတဲ့အတွက်၊ ကျွန်တော်တို့အနေနဲ့ မဲဆွယ်စည်းရုံးရေး မလုပ်ရဘူးလို့ မပြောရုံပဲရှိတယ်။

ကိုဝင်းမင်း။ ။ အဲ့ဒီတော့ အခုလိုဖြစ်လာနိုင်ခြေကို ရွေးကောက်ပွဲကော်မရှင်အနေနဲ့ ကြိုတင် အကြောင်းကြားတာ၊ တိုင်ပင်တာ၊ ဘယ်လိုတခြားနည်းတွေနဲ့ လုပ်ခွင့်ရှိတယ်ဆိုတာကိုရော၊ ညှိုနှိုင်းခဲ့နိုင်တဲ့ အနေအထားရှိခဲ့လား။

ဦးထွန်းအောင်ကျော်။ ။ အဲ့ဒီလို သက်ဆိုင်တဲ့ ကွန်တော်တို့ ပြည်နယ်ရွေးကောက်ပွဲကော်မရှင်ကရော၊ နောက်ကျွန်တော်တို့နဲ့ ထိတွေ့နေတဲ့ ခရိုင်ကော်မရှင်တွေကရော၊ အဲ့ဒိလို ကြိုတင်ပြီးတော့၊ ဖြစ်လာနိုင်ခြေ ရှိတယ်၊ ဘယ်လို ဘယ်လိုဆိုပြီးတော့၊ ကျွန်တော်တို့ကို ခေါ်ယူညိနှိုင်းတာ လုံးဝ မရှိခဲ့ပါဘူး။ကျွန်တော်တို့ကတော့ သတင်းစာရှင်းပွဲတွေကနေ သိရတဲ့အတိုင်းပဲ၊ ဒါခန့်မှန်းခြေပေါ့၊ ၅ မြို့နယ်လောက်ပဲ ဖြစ်မယ်တို့ ဘာတို့ညာတို့ အဲ့လိုပဲ လေ့လာနေတယ်။နောက်တစ်ခုကလည်း တစ်နည်းနည်းနဲ့ကတော့၊ ဘယ်အချိန်မှာဖြင့်၊ ၁ ပတ်ဖြစြ်ဖစ် ၃ ပတ်ဖြစ်ဖြစ်၊ ဒါရောဂါအနေနဲ့ကတော့ ဒီ Lockdown လုပ်ထားတဲ့ ဒေသ၊ လမ်းတွေမှာ သက်သာသွားရင် စည်းရုံးမူတွေ၊ လုပ်နိုင်မယ်လို့ မျှော်လင့်ထားတာ။ဒါပေမဲ့ ဒီလို အစိတ်အပိုင်းလေးတွေတင် မကဘဲနဲ့၊ မြို.နယ်တို့ ပြည်နယ်တို့ တိုင်းဒေသကြီးတို့၊ အဲ့ဒီလို နေရာကျယ်ကျယ်ပြန့်ပြန့်ကို ခုလိုမလုပ်ရဘူးဆိုတော့၊ ကန့်သတ်လိုက်တယ်ဆိုတော့၊ ကျွန်တော်တို့လည်း ဘယ်လိုလုပ်ရမလဲဆိုတာ ခုထိ သေသေချာချာ စဉ်းစားလို့မရသေးဘူး။ဒါပေမဲ့ သက်ဆိုင်တဲ့ ခရိုင်ကော်မရှင်တွေနဲ့၊ ပြည်နယ်ကော်မရှင်တွေနဲ့ကတော့၊ ကျွန်တော်တို့ နိုင်ငံရေးပါတီနဲ့ မဖြစ်မနေ တွေ့ဆုံပြီးတော့၊ မေးမြန်းဖို့တော့ လိုအပ်နေပြီ။

ကိုဝင်းမင်း။ ။ ကိုယ့်ဘက်ကရော ကော်မရှင်ကို သွားတွေ့ဖို့ရှိလား။ဦးထွန်းအောင်ကျော်။ ။ ရှိပါတယ် ခင်ဗျ။အစထဲကလည်း ရွေးကောက်ပွဲကာလမှာ ဒေသန္တရ အမိန့်တွေကလည်း၊ နေ့စဉ်နဲ့အမျှ ၃၊ ၄၊ ၅ ကြိမ် လှည့်ပတ်ပြီးတော့၊ အသံချဲ့စက်တွေနဲ့ အော်နေတာဆိုတော့၊ ဒီလိုဒီလိုဖြစ်လာရင်တော့၊ ဘယ်လို ကျွန်တော်တို့လည်း လုပ်ကိုင်ဆောင်ရွက်နိုင်မလဲ၊ ချွင်းချက်လေးတွေများ ရှိသလားဆိုပြီးတော့၊ သွားဖို့ မေးဖို့တော့ စီစဉ်နေတာ။အဲ့ဒီကြားထဲမှာ ခုလိုထွက်လာတယ်ဆိုတော့၊ သွားကို သွားရမှာ။

ကိုဝင်းမင်း။ ။ အဲ့ဒိတော့ ခုနက အစိုးရဘက်ကနေ လော်စပီကာနဲ့ လိုက်အော်သလိုပေါ့နော်၊ လူတွေမစုပဲနဲ့ အော်နိုင်တာမျိုးကိုဆွေးနွေးမှာအပြင်၊ နောက်ထပ်ရော ဘယ်လိုနည်းတွေကို ဆွေးနွေးဖို့ စဉ်းစားထားလဲ။

ဦးထွန်းအောင်ကျော်။ ။ တစ်ယောက်ချင်း တွေ့လို့တော့ ရနိုင်မယ်ထင်ပါတယ်။ဥပမာ စျေးလာဝယ်တဲ့ အချိန်မှာဖြစ်ဖြစ်၊ တခြားကိစ္စတစ်ခုနဲ့လာတဲ့ ဟို၊ တစ်အိမ်က တစ်ယောက်တော့ ထွက်နေရတယ်။အဲ့ဒီလိုအချိန်မှာ တစ်ဦးချင်းကို၊ ကိုယ့်ပါတီဝင်တွေကတစ်ဆင့်၊ စည်းရုံးလို့ ရနိုင်မလား၊အဲ့ဒီအချက်တွေကိုလည်း ပွင့်ပွင့်လင်းလင်း ခရိုင်ကော်မရှင်တို့၊ ပြည်နယ်ကော်မရှင်တို့ကို မေးရပါလိမ့်မယ်။

ကိုဝင်းမင်း။ ။ ကျေးဇူးအများကြီးတင်ပါတယ်၊ ဦးထွန်းအောင်ကျော်။လက်ရှိ ရခိုင်ပြည်နယ်မှာ ရွေးကောက်ပွဲ ကို ရခိုင်ပြည်သူတွေ စိတ်ဝင်စားမှု မရှိသလောက်ဖြစ်နေတယ်လို့လည်း ဦးထွန်းအောင်ကျော်က ပြောပါတယ်။ ဒါကြောင့် ပြည်သူတွေ ရွေးကောက်ပွဲမှာ မဲပေးလာအောင် ရခိုင်မှာ နိုင်ငံရေးလှုပ်ရှားမှုတွေ ကျယ်ကျယ်ပြန့်ပြန့် လုပ်ကိုင်ခွင့်ပေးဖို့လည်း အစိုးရကို သူက တိုက်တွန်းသွားပါတယ်။

Leave A Reply

Your email address will not be published.

error: Content is protected !!